تمام خوابوں کی تعبیر

تمام خوابوں کی تعبیر میرے ہاتھ پہ رکھ

ہٹا دے تیرگی تنویر میرے ہاتھ پہ رکھ

میں تھوڑی دیر میں اک جرم کرنے والا ہوں

تو ایسا کر مری تعزیر میرے ہاتھ پہ رکھ

میں کتنے روز سے خط کی مہک کو ڈھونڈتا ہوں

سو جھوٹ موٹ کی تحریر میرے ہاتھ پہ رکھ

بہت سے لوگوں کے حق تُو دبا کے بیٹھا ہے

مشقتوں کا صلہ میر! میرے ہاتھ پہ رکھ

نہیں سدھرنا تو پھر ساری کوششیں بیکار

تو چاہے جتنی بھی تفسِیر میرے ہاتھ پہ رکھ

تو میرا دوست ہے شعروں کو میرے دیکھ ذرا

جو ہو سکے ہے تو تاثیر میرے ہاتھ پہ رکھ

مرا وجود تو یوں بھی ہے تیرے ایماء پر

مجھے تو ڈال کے زنجیر میرے ہاتھ پہ رکھ

معاملات ترے ساتھ طے کروں گا میں

مگر تُو پہلے تو کشمیر میرے ہاتھ پہ رکھ

تجھے بھی ہو مری بے کیفیوں کا اندازہ

کبھی تو دل کو ذرا چِیر میرے ہاتھ پہ رکھ

کہانیاں نہ رہیں اب، نہ رنگ آمیزی

محبتوں کی اساطیر میرے ہاتھ پہ رکھ

رشیدؔ اس کے عوض جھونپڑی نہ چھوڑوں گا

بھلے تو ساری ہی جاگیر میرے ہاتھ پہ رکھ

رشید حسرت، کوئٹہ

٠٧، دسمبر ٢٠٢٥