حاصلِ جذبِ دُروں سے واصلِ مطلوب تک

حاصلِ جذبِ دُروں سے واصلِ مطلوب تک
جستجوئے من رواں ہے خوب سے بھی خوب تک

محرمِ حفظِ مراتب قلبِ غافل جب ہوا
پھر درِ دلدار پر دی ریش سے جاروب تک

علمِ استدلال ہے عقل و شواہد پر محیط
اور ہم شوریدگاں ہیں منزلِ محجوب تک

ہے مقدم سیرِ آفاقی پہ سیرِ انفسی
تصفیہ کرتی کہ ہے جو ہر دلِ معیوب تک

ہے تجھے مقصود اگر پانا سراغِ زندگی
اضطرابِ جستجو لے جا کسی مضروب تک

گر نہیں عقل و خرد تابع شعورِ باطنی
پھر نہیں ممکن رسائی عشق کے اسلوب تک

بارگاہِ یار سے گر ہوں نہ آنکھیں روشناس
بے اثر ہے نالہ ءِ شب گیر و سینہ کوب تک

بے حجابانہ لطافت آفریں صد آفریں
نالہ ءِ قلبِ تپاں، پہنچا دلِ محبوب تک

تُو ہے جامؔی ایک ایسا راہِ خضری کا چراغ
روشنی پاتے ہیں جس سے سالک و مجذوب تک

شاہ محمود جامؔی
سیالکوٹ پاکستان