ہر چند دن بعد ایک نئی خبر، ایک نیا سانحہ، ایک نئی گنتی—ان گنت جنازے۔ کبھی سوات کی وادیاں سوگ میں ڈوبی، کبھی ہنزہ کے پہاڑوں نے مسافروں کو واپس نہ آنے دیا۔ چلاس، سکردو، بونیر… جہاں کبھی سیاح خوشبو اور ہوا کا مزہ لینے جاتے تھے، وہاں اب خاموشی اور قبرستان جیسا سکوت ہے۔ راولپنڈی میں دریائے سواں کی بپھری ہوئی لہر نے گھروں کی بنیادیں اکھاڑ دیں، زندگیوں کو بہا کر لے گئی۔
یہ زمین، یہ پہاڑ، یہ دریا—یہ سب ہمارے اپنے ہیں۔ مگر ہم نے ان کے ساتھ وہی سلوک کیا جو ایک نافرمان وارث اپنے بزرگوں کے ساتھ کرتا ہے: بے اعتنائی، غفلت، اور حد سے زیادہ لالچ۔ نتیجہ یہ ہے کہ فطرت اب خاموش تماشائی نہیں رہی، بلکہ گواہی دینے والے کی طرح ہمارے خلاف بولنے لگی ہے۔
بارش ہو تو شہر ڈوب جاتے ہیں، پہاڑوں پر بادل پھٹیں تو بستیاں بہہ جاتی ہیں، دریا بپھریں تو راستے، پل اور کھیت نگل لیتے ہیں۔ اور ہم؟ ہر بار ایسے گھبرا جاتے ہیں جیسے یہ آفت پہلی بار آئی ہو۔ آٹھ دہائیوں کے اس سفر میں ہم نے ترقی کے ہزار دعوے کیے، مگر قدرتی آفات سے بچاؤ کا کوئی مؤثر نظام نہ بنایا، نہ کوئی مستقل پالیسی، نہ کوئی مضبوط ادارہ۔
ہم نے ندی نالوں کا راستہ روک کر مکان کھڑے کر دیے، پہاڑوں کے سینے چیر کر سڑکیں ڈال دیں، جنگلات کاٹ کر کنکریٹ کا جنگل اگا دیا۔ ہم نے فطرت کی برداشت کو آزماتے آزماتے اس کی حد عبور کر دی، اور اب وہ حساب برابر کر رہی ہے۔
دنیا کے ترقی یافتہ ممالک میں آفات سے نمٹنے کے لیے برسوں پہلے منصوبے بنائے جاتے ہیں، ایمرجنسی ٹیمیں تربیت یافتہ ہوتی ہیں، ڈیم اور نکاسی کا نظام مضبوط ہوتا ہے، اور ہر شہری جانتا ہے کہ بحران میں کیا کرنا ہے۔ ہمارے ہاں بارش کا پہلا قطرہ گرتے ہی بجلی غائب، گلی ندی، اور حکومت کہیں دور اخبار کے بیانات میں۔
قدرت کے اصول بڑے سادہ ہیں—جو اس کے ساتھ توازن میں رہے گا، وہ محفوظ رہے گا۔ ہم دعا ضرور کریں، مگر یہ بھی یاد رکھیں کہ دعا کے ساتھ تدبیر ضروری ہے۔ بصورتِ دیگر، ہم ہمیشہ وہی قوم رہیں گے جو تباہی کے بعد ملبہ اٹھاتی ہے، بجائے اس کے کہ تباہی کا راستہ روکے۔
اللہ کرے ہم عقل، منصوبہ بندی اور فطرت سے صلح کا ہنر سیکھ لیں، اس سے پہلے کہ یہ زمین ہمارے وجود سے بیزار ہو جائے۔
صائمہ اکرم چوہدری
