وحید احمد آڈیٹوریم کی تعمیر

مانسہرہ میں ممتاز شاعر، ادیب، اور ادبی جریدے "شعر و سخن” کے مدیر جان عالم نے جو میری عزت افزائی کی ہے میرے پاس اس احسان کا شکریہ ادا کرنے کے لئےالفاظ نہیں ہیں۔
انہوں نے اپنے تعلیمی ادارے رحمانیہ پبلک سکول اینڈ کالج مانسہرہ کی نئی نویلی عمارت میں میرے نام کا ایک شاندار آڈیٹوریم تعمیر کروایا ہے، وحید احمد آڈیٹوریم، جس کو ادبی تقاریب کے لئے مختص کیا جائے گا۔ انشاءاللہ اسی ماہ اس نو تعمیر شدہ آڈیٹوریم کا افتتاح ہو گا۔
یہی نہیں، انہوں نے وحید احمد ادبی ایوارڈ کا اجراء بھی کیا ہے جو ایک طرح کا لائف ایچیومنٹ ایوارڈ ہے۔ یہ ایوارڈ ایک کمیٹی کی منظوری سے ہر سال ان ادیبوں کو دیا جائے گا جنہوں نے اپنی زندگی ادب کو دے دی اور علم و ادب کو ثروت مند کیا۔ یہ ایوارڈ کسی بھی سماجی دباؤ سے مبرا ہو گا اور مستحق ترین تخلیق کاروں کو پیش کیا جائے گا۔
ہزارہ ہمارے ملک کا خوبصورت ترین علاقہ ہے اور مانسہرہ اس کا دل ہے۔ مانسہرہ اگی اور بالاکوٹ سے ہوتا ہوا کاغان اور ناران کی وادیوں اور ندیوں کی خوشبو سمیٹتا سیف الملوک اور ملحقہ جھیلوں تک جاتا ہے، جہاں پریاں اترتی ہیں۔
جیسے مانسہرہ خوبصورت ہے بالکل اسی طرح جان عالم کا دل حسین ہے۔ وہ بہت عمدہ شاعر، ادیب اور معلم ہیں۔ گذشتہ 25 سال سے پورے ہزارہ ڈویژن کے اکلوتے سہ ماہی ادبی جریدے "شعر و سخن” کے مدیر ہیں۔ اب تک اس جریدے کے 100 نمبر آ چکے ہیں۔ جان عالم کی ذمے داری کا عالم یہ ہے کہ یہ ادبی رسالہ ہمیشہ وقت پر شائع ہوا ہے اگرچہ جان عالم اس کا سارا انتظام خود اکیلے کرتے ہیں۔ ساری دنیا سے موصول شدہ ادب پارے جمع کرنا، ان کا چناؤ، اپنے ہاتھ سے لیپ ٹاپ پر کتابت، راولپنڈی میں اشاعت اور اس کی تقسیم، یہ سب کام وہ تن تنہا کرتے ہیں۔ اختصاص یہ ہے کہ "شعر و سخن” ہمیشہ وقت پر چھپتا ہے۔ میں سالہا سال سے جان عالم کی اس تن دہی کا چشم دید گواہ ہوں۔
یہ سال ایک سنگ میل کی حیثیت رکھتا ہے۔ اس سال "شعر و سخن” کی سلور جوبلی اور شماروں کی سینچری کی شاندار تقریب اور ساتھ ہی "وحید احمد ایوارڈ” کی تقسیم نئے نویلے "وحید احمد آڈیٹوریم” میں اسی ماہ منعقد ہو گی جب آڈیٹوریم کا افتتاح کیا جائے گا۔ انشاءاللہ۔
میں بہت خوش قسمت ہوں۔ لائل پور سے ہوں، اسلام آباد میں رہتا ہوں اور دیکھئیے کہ میرے نام کا آڈیٹوریم صوبہ خیبر پختون خواہ کے خوبصورت اور تاریخی شہر مانسہرہ میں تعمیر ہوا ہے۔ یہ کرہ ارض پر، ساری دنیا میں پہلی عمارت ہے جو میرے نام کی ہے۔

جان عالم
میرے پیارے
ہم لوگ شاعر ہیں۔ ہمارے پاس الفاظ اور تراکیب کے ذخیرے ہیں۔ ہم لوگ لفظوں سے کھیلتے ہیں. مگر یقین کیجئے کہ آپ کی اس عنایت اور مہربانی کا شکریہ ادا کرنے کے لئے مجھے الفاظ نہیں مل رہے۔ پلکیں جھپک کر آپ کو آنکھوں سے دعائیں ہی دے سکتا ہوں جو ابھی لکھتے ہوئے بھر گئی ہیں ❤️

وحید احمد
6 مئی 2025