ہے بحرِ بے کَنار سے اَفزُود تیری یاد
ہر گوشہِ وجود میں مَنضُود تیری یاد
زندانِ خاکدان میں مَحبُوس روح کو
پل پل قرار دیتی ہے مَعبُود تیری یاد
ملتا ہے ذی شعور کو رزقِ طَہارَتی
ناپاک جُز کو کرتی ہے نابُود تیری یاد
تاباں ترے شَغَف سے ہے ہر جُزوِ زندگی
ہر شعبہِ حیات میں بِہبُود تیری یاد
رگ رگ بیادِ یار ہے سرشار و شادماں
اغیار کو ہے موجِبِ مَحسُود تیری یاد
قُرب و وصال و ہجر ہوا سب فنائے”ھو
یوں وارِد الوجود ہے مَشہُود تیری یاد
تسکین اور عابدِ شب زندہ دار کو
مجھ کو قَلَق دے اور ہی مَودُود تیری یاد
گزرا نہ ایک عمر سے اپنا خیال تک
رکھتی ہے تیری یاد میں مَحدُود تیری یاد
بے مہر دل کو سجدہِ الفت نواز کر
درد آشنا بناتی ہے مَسجُود تیری یاد
جسم اور روح کون و مکاں کا خیال کیا
ہر اک خیالِ خام پہ مَطرُود تیری یاد
دیوانگی بہ عشق ہے جوش و خَروش پر
راہِ جُنُوں میں رکھتی ہے مَعقُود تیری یاد
جامؔی یہی ہے قبلہِ مطلوبِ آرزو
مقصود اور حاصلِ مَقصُود تیری یاد
شاہ محمود جامؔی
سیالکوٹ پاکستان
