536
حاشیہ
کسی رات کی تیرگی سے نکالا ہوا راستہ ہوں
سیاہ حاشیہ ہوں
سیاہی کہ جو بیکراں کائناتوں کا ملبوس پہنے ستارےجنے گی
سیاہی کہ جس کے سیاہ ریشمی پلووں پر کرن اور گوٹی کا بخیہ لگا کر سیا ہے
مہارت سے صبح کا ستارہ کسی نے
سیاہ حاشیہ ہوں جو بپھرے ہوئے
پانیوں کو جدائی کے ساحل میں جب روکتا ہے
تو کتنے تھپیڑوں کو سہتا ہے خود پر
تمہیں کیا خبر کیسے گرتی لڑھکتی ہوئی زندگی کو اُٹھاتی رہی ہوُں
کہاں کس طرح خود سے خود کو بچاتی رہی ہُوں
تمیں کیا خبر کہ میں کیا سوچتی ہوں
مجھے تم نے اک بار جنما تھا اور اب مکاں در مکاں میں ہزاروں برس سے تمیں جَن رہی ہوں
کبھی ایسے لگتا ہے میں حاشیہ ہوں
مرا کوئی مطلب نہ معنی
نہ صورت کی لیلا
کبھی ایسے لگتا ہے جیسے کہ میں اک مسلسل بہاوُ میں ہُوں اور زمانوں کی تحدید بندی پہ مامور ہوں
اِک کنارے پہ رہنے کو مجبور ہوں
۔۔۔
شازیہ اکبر
