رخ دلبر میں، رُوئے یار میں

رخ دلبر میں، رُوئے یار میں کیا رکھا ہے
کسی خاکی، کسی دلدار میں کیا رکھا ہے

تجھ کو محسوس کیا ہے تو کھلا ہے مجھ پر
سامنے آنے کے اصرار میں کیا رکھا ہے

ہے فقیری بھی تری راز، مرے پردہ نشیں
عشوہ و ناز کے انبار میں کیا رکھا ہے

تیرے محبوب سے منسوب ہے، مقبول ہے وہ
ورنہ اس غار کی دیوار میں کیا رکھا ہے

جو ولایت تری اُترے تو مرے مالکِ ملک
تیری مخلوق کے اسرار میں کیا رکھا ہے

رحم والا ہے تو حد درجہ، وگرنہ مولا
مجھ گناہ گار کے اقرار میں کیا رکھا ہے

میں مصور ہوئی مامور تری مدحت پر
ورنہ ان مصرعوں میں، اشعار میں کیا رکھا ہے

سیدہ مصور صلاح الدین