508
دھیان میں وا دریچہء چشمِ کرم کیے ہوئے
بیٹھے ہیں اپنے دشت کو باغِ ارم کیے ہوئے
دیکھ رہا ہوں دَور میں سارے صراحی و سبو
جامِ سفالِ صبر کو ساغرِ جم کیے ہوئے
صبح وہ جتنی دیر تک باغ میں گھومتا رہا
سر و سمن کھڑے رہے گردنیں خم کیے ہوئے
اُس کے جواب کی مجھے آج بھی ہے اُمید سی
جیسے ہوئے ہوں چار دن حال رقم کیے ہوئے
اے مرے ہم نواؤ آؤ آج بہت شبیں ہوئیں
نعرہ زناں ہوئے ہوئے، دَم ہمہ دَم کیے ہوئے
رات معاصروں میں ہم لے کے گئے غزل شعور
پہنچے ہوا کے سامنے شمع عَلم کیے ہوئے
