یکساں نگارِ دہر میں ہر ایک رنگ ہے

یکساں نگارِ دہر میں ہر ایک رنگ ہے
یہ خود نمائی چشم و بصیرت کا زنگ ہے

اب خار زیب و زینتِ شاخ و شجر ہُوئے
اب کیا عجب کہ غنچہءِ تن لالہ رنگ ہے

کرتا ہے اب سوال دلِ بد خصال بھی
اس شمعِ عارضی کا تُو کیونکر پتنگ ہے

پنبہ بگوش آزِ جہاں نے کِیا تجھے
اے بے خبر نوائے اجل بے درنگ ہے

یوں شدّتِ طلب میں ہُوا بے طلب بشر
نے خواہشِ نمود ہے، نے خوفِ ننگ ہے

تُو عقلِ خام، تجھ پہ گراں خواہشِ جہاں
اے بد گماں یہ عشق گراں بار سنگ ہے

یک لخت پُر سکون ہے، یک لخت پُر جنوں
وارفتگی میں دل کا کوئی ایک رنگ ہے!

کر التفات آشتیِ قول و فعل پر
کیا عرصہءِ حیات یونہی تجھ پہ تنگ ہے؟

ہر گام پُر تضاد ہیں کیوں عقل و دل فرید
یہ رہ گزارِ شوق ہے، میدانِ جنگ ہے؟

فرید احمد دیو