88
کبوتروں کو اڑاتا ھوں ، اور دیکھتا ھوں
فضا کا حسن بڑھاتا ھوں ، اور دیکھتا ھوں
.
یہ آنکھ مفت میں کچھ بھی نہیں دکھاتی مجھے
میں اس کو خواب دکھاتا ھوں ، اور دیکھتا ھوں
.
سنائی دیتا ھے کس کس کو، کون سنتا ھے؟
گلی میں شور مچاتا ھوں اور دیکھتا ھوں
.
کبھی میں پوچھتا رہتا تھا، کون ھے در پر؟
اور اب میں دوڑ کے جاتا ھوں ، اور دیکھتا ھوں
.
دھمال ڈالنے آتا ہے روز ایک ملنگ
میں روز دیکھنے جاتا ھوں، اور دیکھتا ھوں
.
سنا ہے موت مداوا ہے زیست کے غم کا
چلو میں جان سے جاتا ھوں، اور دیکھتا ھوں
.
حیا سے کیسے بدلتی ہے رنگت_ رخسار ؟
میں اس کو شعر سناتا ھوں اور دیکھتا ھوں
.
کشش زمیں میں زیادہ ھے آسمان میں کم
ہوا میں خاک اڑاتا ھوں اور دیکھتا ھوں.
.
جو شخص پیار کا منکر ہے، سامنے آۓ
میں اس سے آنکھ ملاتا ہوں اور دیکھتا ہوں
ممتاز گورمانی
