371
ٹیڑھی ترازو
پھسلنا نہیں تھا
مگر اُس کے پھسلاؤ میں ایسی پھسلن تھی
کوئی رُکے بھی تو کیسے
وہ ہنستی تو عالم کو مسرور کرتی
وہ چلتی تو وعدوں کے مینار ٹھوکر سے مسمار کرتی
وہ رُکتی تو دنیا کو ٹھہرا کے رُکتی
نگاہوں کے گرداب ایسے
مسافر کو اپنی طرف دور سے کھینچ لیتے!
پھسلنا نہیں تھا
مگر میرے ہونٹوں سے باتیں پھسلنے لگیں
جھوٹی سچّی وہ باتیں جو پھسلاتی ہیں
کیا کہا ……؟
تم مرے گھر میں رہتی ہو، میری ہو، میری!
تمہیں حق نہیں ہے کسی اور جانب کو پھسلو
تمہارے لیے صرف میں ہوں
یہ ہرگز نہ بھولو
کہ تم ”تم“ ہو اور میں تو صدیوں سے ”میں“ہوں!
شہزاد نیّرؔ
