ہوا کے دوش پہ بادل بنا کے چھوڑ دیتا ہے
مجھے لگتا ہے وہ پاگل بنا کے چھوڑ دیتا ہے
وہ رکھتا ہے بڑے ہی پیار سے ہر زخم پہ مرہم
پھر اپنے پیار کا گھائل بنا کے چھوڑ دیتا ہے
وہ خود ہی رقص کرتی ہے چھنا چھن چھن چھنا چھن چھن
وہ کاغذ پر فقط پائل بنا کر چھوڑ دیتا ہے
گماں کو بدگمانی کے اثر میں مت بدلنے دو
یہ دل کے راستے ،دلدل بنا کے چھوڑ دیتا ہے
عجب جادوگری ہے صائمہ اس کی نگاہوں میں
وہ کالی رات کو کاجل بنا کے چھوڑ دیتا ہے
سیدہ صائمہ کامران