کیوں ہوا کیسے ہوا

کیوں ہوا کیسے ہوا مجھ سے جدا جانتا ہوں
میں تو اس شخص کو عرصے سے بڑا جانتا ہوں

میں تو سونا ہوں مجھ اس سے ڈراتے کیا ہو
میں تو اس آگ میں جلنے کا مزا جانتا ہوں

میرا منصف میرے قاتل کی ادا جانتا ہے
وہ بھی کیا د ے گا بھلا اس کو سزا جانتا ہوں

ناصحا چھوڑ یہ باتیں کہ حیا آتی ہے
کیا کہوں کیسے کہوں تجھ سے کہ کیا جانتا ہوں

مری اولاد وہی بات ہی کرتی ہے کلیم
جس سے میں روکتا ہوں جس کو بُرا جانتا ہوں

کلیم احسان بٹ