بلا کا ضبط کیا، حوصلے سے چال چلی

بلا کا ضبط کیا، حوصلے سے چال چلی
گلو میں تیر تھا ، پر سامنے سے چال چلی

ہمارے بیچ کوئی تیسرا تو تھا ہی نہیں
سو ہم ہی دونوں نے اک دوسرے سے چال چلی

ضروری بات ہے ، کہہ کر ، اُسے قریب کیا
گلے لگانا تھا ، سو ، فاصلے سے چال چلی

ہنسی کی بات پہ ہونٹوں کو تھر تھرایا نہیں
سنا لطیفہ مگر ، قہقہے سے چال چلی

تمھارے بعد کسی دوسرے کو چھو کے دوست
تمھارے لمس کے ہر زائقے سے چال چلی

احمد آشنا