تُونے کُچھ ایسا کیا شہر میں تنہا مُجھ کو
راس آیا نہ تِرے بعد زمانہ مُجھ کو
کھا گئے مُجھ کو تِرے آدھے ادُھورے سپنے
کب ملا ہے یہ تِرا عِشق بھی پُورا مُجھ کو
ایک تو شامِ تمنا بھی بُجھی رہتی ہے
اُس پہ یہ تیری محبت کا خسارہ مُجھ کو
اب بھی بستر پہ پڑا جِسم تِرا دیکھتا ہُوں
اب بھی اِک خواب سا ہے روز بُلاتا مُجھ کو
پُوچھ مت مُجھ سے مِری پیاس کی شدت کیا ہے!
تیرے ہُونٹوں کی طرح لگتا ہے صحرا مُجھ کو
رقص جاری ہے سرِ شہرِ تمنا محبوبؔ
کر گیا اور بھی رُسوا یہ تماشا مُجھ کو
محبوب صابر