مُرغِ حریص و کِبر مُقَفَّل پَسَند ہے
درپیشِ یار مُعجِزِ اَرذَل پَسَند ہے
سَہلُ العَمَل اگرچہ نہیں راہِ اِشتِیاق
تَاہَم فَتِیلِ سوز یہ مَشعَل پَسَند ہے
روزِ رواں کے لطف و عنایت بجا مگر
جس کَل میں عہدِ دید ہے وہ کَل پسند ہے
رکھے جو تار تار ہمہ وقت جان و دل
مجھ کو درونِ سینہ وہ ہلچَل پسند ہے
دل کے اُجاڑ دشت و بیاباں میں نِصف شب
آنکھوں سے جو برستا ہے بادَل پسند ہے
مضموم حرف ہے جو کہ لوحِ جہان پر
ناچیز و خاکسار وہ اجمَل پسند ہے
کیونکر نجانے بسترِ مَخمَل سے ہے نَفُور
شاید کہ تَن کو تختہِ مَقتَل پسند ہے
افعالِ اضطرار سے کرتے ہیں اجتناب
گُفت و شُنِید بھی جنہیں سَچَّل پسند ہے
جامؔی تمام عمر اگرچہ ہے محترم
گزرے خیالِ یار میں جو پَل، پسند ہے
شاہ محمود جامؔی
سیالکوٹ پاکستان