بس میں اپنے آپ دی منکر نہیں ہوئی
نہیں تے تیرے پچھے کافر نہیں ہوئی؟
اُچی اڈی والی جُتی پا کے وی
میں شملے دے قد برابر نہیں ہوئی
اوہ میرے لئی تارے توڑ لیایا اے
دل دی دھرتی ایویں انبر نہیں ہوئی
تِن فُٹ اُتے آں تے تِیہ فُٹ تھلے آں
میں جِنی آں اونی ظاہر نہیں ہوئی
جو جو کہندا اے میں منّی جانی آں
گل اجے تک سمجھوں باہر نہیں ہوئی
سوچ ذرا توں انج دی کوئی سدھر اے؟
جیہڑی تینوں ویکھ کے تِتر نہیں ہوئی
ویکھن والے ویکھکے پتھر ہو گئی اے
طاؔہرہ شیشا ویکھ کے پتھر نہیں ہوئی
طاہرہ سرا