اوہ کہندا اے نہ گبھراؤ، نہ گبھراؤ
روٹی دی تھاں مٹی کھاؤ، نہ گبھراؤ
ایہناں کیہڑا پڑھ لِکھ افسر بننا اے
بالاں نُوں بندوق پھڑاؤ، نہ گبھراؤ
اصل سکون تے قبر دے وِچ ای ملدا اے
جیوندیاں تے وی مِٹّی پاؤ، نہ گبھراؤ
اینے سوہنے ہو کے وی کیہ کرنا اے؟
صابن مہنگائے تے نہ لاؤ، نہ گبھراؤ
آٹا، دالاں، گھئیو تے چینی وادھو اے
"مثبت خبراں” سُندے جاؤ، نہ گبھراؤ
ہُن تے تُک ای نہیں بندا گبھراون دا
چِھتر لاہ لَو، لمّیاں پاؤ، نہ گھبراؤ
طاہرہ سرا