مٹی وچ وی ہمت ڈھالی جاندی نہیں
کُجھ وی کر لاں اکھ دی لالی جاندی نہیں
اج کل وی اک یاد سنبھالی پھرنا واں
اج کل تے اولاد سنبھالی جاندی نہیں
اتھرو نہیں پٹرول جیہا اے پلکاں تے
ڈردے میتھوں تیلی بالی جاندی نہیں
جیبھ ورگی کوئی ریفل ہے نا ہووے گی
ایہدی اک وی گولی خالی جاندی نہیں
نیندر گھیر لیا تے ڈِگنا پینا ایں
آئی موت کلیما ٹالی جاندی نہیں
حوالہ: ہان دی سولی، تجمل کلیم؛ اسلام آباد 2012، صفحہ 141
تجمل کلیم