بابل رے توری بنتی کروں ہوں، کان لگا کر سُن
دل کی بات بہت مدّھم ہے، دھیان لگا کر سُن
آنکھیں جس کی چاہ کریں بس وہ مجھے چُھونے پائے
میں جس ھاتھ کو جانوں ناھیں کبھی نہ مجھ تک آئے
موہ پریت کا بھوجن مورا اور کوئی نہ کھائے
تھالی اُس کے آگے رکھوں جو مورے من بھائے
بابل تجھ سے پھول نہ مانگوں پھول کی باس اُڑ جائے
پیارے پی کا پیار دلا دے کبھی نہ جو کملائے
بابل تجھ سے دھیج نہ مانگوں، مانگوں ایک نیائے
من بھاون مورا گھونگھٹ کھولے، من بھاون لے جائے
شہزاد نیّرؔ